ရန်းခူ RanKhu ကယန်းရွာ

မိုးမြင့်ထက်က ထူးခြားဆန်းကြယ်သော ရှေးအကျဆုံး " ရန်းခူ RanKhu ကယန်းရွာလေးကို တစ်ခါတစ်ခေါက်တော့အရောက်လာလည်စေချင်ပါသည် ❤️❤❤
============================

( အချိန်လေး (၂) မိနစ်ပေးပြီးဖတ်ပေးကြပါဗျာ )

ကျွန်တော်တို့တိုင်းပြည်မှာ နေရာဒေသစုံစုံလင်လင် မရောက်ဖူးကြသေးတဲ့သူတွေရှိနေသေးကြသလို ခေတ်နဲ့အညီမြို့ပြများရဲ့တိုးတက်ပြောင်းလဲမှုတွေကိုဘဲ စိတ်ဝင်တစားဗဟုသုတအဖြစ်ခရီးတွေထွက်နေကြတဲ့လူငယ်လူရွယ်တွေလည်းရှိနေကြပြီး လူသူအရောက်အပေါက်နည်းတဲ့တောင်တန်းဒေသကတိုင်းရင်းသားလူမျိုးစုတွေ ရဲ့ ရိုးရာမပျက်နေထိုင်ကြတဲ့ကျေးရွာငယ်လေးတွေကိုတကူးတကာ့သွားရောက်လေ့လာကြတဲ့လူငယ်လူရွယ်တွေလည်းရှိလာကြတာကိုတွေ့မြင်လာရပါတယ်..။

ယခုကျွန်တော်ရေးသားတင်ပြမယ့် " ရန်းခူကယန်း " ရွာလေးဟာ ဟိုးယခင်ဘိုးဘေးဘီဘင် ၁၇ ရာစုနှစ်များစွာကတည်းက ရိုးရာမပျက်စည်းလုံးညီညွတ်စွာမြင့်မားသောတောင်တန်းကြီးရဲ့ကျောက်ဆောင်ကျောက်တုံးကြီးများပေါ်မှာရှေးအကျဆုံးသော " ရန်းခူ " ကယန်းရွာလေးတစ်ရွာဟာအင်မတန်သာယာလှပပြီး ထူးခြားမှုများစွာနဲ့ငြိမ်းချမ်းစွာစုပေါင်းမှီတင်းနေထိုင်ကြတဲ့ရွာလေးကိုတော့လူသိနည်းကြလိမ့်မယ်လို့ထင်မြင်မိပါတယ် ။ 

သို့ပေမယ့် နိုင်ငံခြားသားခရီးသွားတစ်ချို့ကတော့စိတ်ဝင်စားစွာနဲ့သွားရောက်လေ့လာနေကြပါပြီ..

ဘယ်လိုသွားရမလဲလို့မေးရင်တော့..

ဒီးမော့ဆိုမြို့ကနေ ဆီဘူး ၊ ဆူးပြောင်းလမ်းအတိုင်း အချိန်တစ်နာရီခွဲခန့်မောင်းနှင်ရပြီး ဆီဘူးမရောက်ခင် " ခွီးတလုပ် " ရွာလမ်းခွဲကနေမှတဆင့်ညာဘက်ကျောက်ချောလမ်းလေးအတိုင်း ( ၁၄ ) မိုင်ခန့်အကွာကိုမောင်းသွားမယ်ဆိုရင်တော့ တောင်ထိပ်ပေါ်မှာရှိတဲ့ကျောက်ဆောင်ကျောက်တုံးတွေပေါ်မှာ သံဖိနပ်မပါဘဲသစ်သားတိုင်များကိုစတုရန်းကျကျမေးတင်ပြီး ဆောက်လုက်ထားတဲ့ပျဉ်ထောင်အိမ်အလုံး (၆၀) ခန့်ရှိတဲ့ ကယန်းတိုင်းရင်းသားများနေထိုင်ကြတဲ့ " ရန်းခူ ကျောက်ဆောင် " ရွာကိုအံ့သြမှင်သက်စွာမြင်တွေ့ရမှာဖြစ်ပါတယ် ။
ကျောက်ဆောင်ကျောက်တုံးအကြီးအသေးပေါ်လိုက်ပြီးအိမ်အရွယ်အစားပုံသဏ္ဍန်များလည်းကွာခြားကုန်ပါတယ် ၊
သဘာဝကျောက်ဆောင်ကျောက်တုံးများက အိမ်ဆောက်တဲ့နေရာမှာ Natural Foundation ပုံသဏ္ဍန်လိုဖြစ်နေတာကိုတွေ့ရပါတယ် ။
သူတို့ရဲ့အိမ်ဆောက်လုပ်ခြင်း Thechniq
& Method ကလည်းမချီးကျူးဘဲမနေနိုင်ပါဘူး ၊။ 

ရန်းခူရွာရဲ့ပတ်ပတ်လည်မှာမြင့်မားတဲ့ရှမ်းတောင်တန်းကြီးများ ၊ ကယားတောင်တန်းကြီးများကို ရှူ့မငြီးလှတဲ့သဘာဝအလှအပများကိုလွမ်းမောစွာကြည့်ရှု့ခံစားနိုင်မှာဖြစ်ပါတယ် ၊ နေ့ချင်းပြန် ( Day Return ၊ Day Trip ) သွားရောက်ကာကယန်းလူမျိုးတို့ရဲ့ရှေးရိုးရာမပျက် ဘဝနေထိုင်မှုဓလေ့ထုံးစံများကိုလည်းအနီးကပ်လေ့လာနိုင်မှာဖြစ်ပါတယ် ။

နွေးထွေးပျူငှာစွာ ဖော်ရွေတတ်တဲ့ကယန်းလူမျိုးတို့ရဲ့ထိုရွာလေးမှာ တစ်ညတာအိပ်စက်အနားယူကြမယ်ဆိုလျှင်လည်းသန့်ရှင်းသပ်ရပ်စွာစီစဉ်ဆောင်ရွက်ပေးကြပါတယ် ။

ရန်းခူကျေးရွာလေးဟာ ရှမ်းပြည်နယ်တောင်ပိုင်းဖယ်ခုံမြို့နယ် ( ယခင်မိုးဗြဲမြို့နယ်) အလယ်ကယန်းကျေးရွာအုပ်စုတွင်တည်ရှိပါသည် ၊ အရှေ့မြောက်ဘက်တွင် ကရားကျေးရွာနှင့်ဝှါစမ်းရွာဟောင်း ၊ အနောက်မြောက်ဘက်တွင် တိုတန်ကျေးရွာ ၊ အနောက်ဘက်တွင် ရေကန်ပူလောကျေးရွာ ၊ အရှေ့တောင်ဘက်တွင်ဖူးလောင်းကျေးရွာနှင့် အရှေ့ဘက်တွင် ဟိုက်တုံကျေးရွာတို့အကြားတောင်ထိပ်ပေါ်ရှိသဘာဝကျောက်ဆောင် ကျောက်တုံးကြီးများပေါ်တွင်သံဖိနပ်မပါဘဲတည်ဆောက်ထားသောကြောင့်အင်မတန်ထူးခြားဆန်းပြားသော ကယန်းလူမျိုးစုများနေထိုင်ကြသည့် ရှေးဟောင်းရွာလေးတစ်ရွာဖြစ်ပါသည် ။
ရန်းခူ( RanKhu ) ဆိုသည့်ဝေါဟာရမှာကယန်းဘာသာဖြင့် " လုံရန်ခူ " ဟုအဓိပ္ပာယ်ဖွင့်ဆိုထားပါသည် ၊ မြန်မာလို " ကျောက်ဆောင် " ဖြစ်ပြီး အင်္ဂလိပ်လို " Rocky “ ဟုအဓိပ္ပာယ်သက်ရောက်ပါသည် ၊ ကျောက်ဆောင်၏ရှင်းလင်းချက်တွင်ကား " ကျောက် " ဆိုသည်မှာ " ခိုင်မာသော ၊ ခိုင်ခံ့သော ၊ လေးနက်သော ၊ တည်မြဲသောဟု " အဓိပ္ပာယ်ဖြစ်ပြီး " ဆောင် " ဆိုသည်မှာ " စွမ်းဆောင်နိုင်ခြင်း ၊ စုစည်းနိုင်ခြင်း ၊ စည်းလုံးနိုင်ခြင်း " ဟုအဓိပ္ပာယ်သက်ရောက်ပါသည် ။ 

ထူထပ်သောသစ်တောများ ၊ တောင်တန်းတောင်စွယ်များ၏အကြား မိုးမြင့်ထက်တွင်ထာဝရအမြဲစိမ်းလန်းစိုပြေငြိမ်းချမ်းစွာနေထိုင်သောကျေးရွာဖြစ်ပါသည် ။
ရန်းခူကျေးရွာ၏ဧရိယာအကျယ်အဝန်းမှာအလျား (၅) ဖာလုံ ၊ အနံ(၂) ဖာလုံခန့်သာရှိပါသည် ။ ရာသီဥတုမှာအပူအအေးမျှတကာ တောင်တန်းဒေသဖြစ်သဖြင့်အပူချိန်နည်းပါးပြီးမိုးများသောဒေသဖြစ်ပါသည် ။
ရန်းခူဆွေမျိုးစုသည် ကယန်းအမျိုးသားဖြစ်ပြီး " လထာ " မျိုးနွယ်စုဝင်ဖြစ်ပါသည် ၊ ရွာတည်မှစ၍၁၉၆၉ ခုနှစ်အထိ ( နတ်စား ) နတ်ကိုးကွယ်ယုံကြည်ပြီး ၁၉၇၀ ပြည့်နှစ်မှစ၍ ယနေ့အထိကက်သလစ်ဘာသာကို သက်ဝင်ယုံကြည်လာခဲ့ကြပါသည် ။

၁၉၇၄ ခုနှစ်မှ၁၉၈၆ခုနှစ်အထိ ကိုယ်ထူကိုယ်ထကျောင်းကိုဖွင့်လှစ်ခဲ့ပြီး ၁၉၈၆ ခုနှစ်မှာ အစိုးရမူလတန်းကျောင်းအဖြစ်အသိအမှတ်ပြုခဲ့ခြင်းဖြစ်ပါသည် ၊ ရန်းခူဆွေမျိုးစုနှင့်ကျေးရွာတို့သည်လွန်ခဲ့သည့်သက္ကရာဇ်နှစ်ပေါင်း ၁၅၀၀ ခန့်က တည်ရှိခဲ့သောကျေးရွာတစ်ရွာဖြစ်ပါသည် ။

ရှေးဘိုးဘေးဘီဘင်အဆက်ဆက်ပြောဆိုချက်များအရ ၁၇၀ဝပြည့်နှစ်ခန့်ကတည်းကလက်ရှိရန်းခူကျေးရွာတည်ရှိသော " လုံရန်ဆောင် ( Rocky - ရန်းခူကျောက်ဆောင် ) နေရာသည်တည်ရှိခဲ့ကြောင်းလေ့လာတွေ့ရှိခဲ့ကြောင်းမှတ်တမ်းများအရသိရှိရပါသည် ။

ဤနေရာကိုရွာတည်ရခြင်းအကြောင်းရင်းမှာ ထိုစဉ်ကာလက တစ်ရွာနှင့်တစ်ရွာ ဓါး ၊ လှံနှင့်စစ်တိုက်ရခြင်း ၊ မီးဘေး ၊ လေဘေးများကိုပိုမိုကာကွယ်နိုင်ခြင်း ၊ ရေပိုနီးခြင်း၊ တောင်ယာခုတ်စားသည့်နေရာပိုမိုရရှိလာခြင်းစသည့်အကြောင်းရင်းများကြောင့်ကျောက်ဆောင်ပေါ်တွင် ရွာတည်ရခြင်းဖြစ်သည်ဟုလေ့လာချက်များအရသိရှိရပါသည် ။
မိရိုးဖလာရိုးရာစိုက်ပျိုးရေးလုပ်ငန်းများကိုသာအဓိက အားထားကာ နှစ်ရှည်လိမ္မော်ပင်များ ၊ ရွှေ့ပြောင်းတောင်ယာစိုက်ခြင်းများဖြင့်အသက်မွေးဝမ်းကြောင်းပြုကြပါသည် ။

ရန်းခူကျေးရွာကို ၂၀၀၃ ခုနှစ်မှ၂၀၀၆ ခုနှစ်အထိကိုယ်ထူကိုယ်ထစနစ်ဖြင့်နွေရာသီသုံးမြေသားလမ်းကို လူအားနှင့်ဖောက်လုပ်ပြီး ကယန်းပြည်သစ်ပါတီငြိမ်းချမ်းရေးအဖွဲ့နှင့်ရပ်ရွာလူထုများပူးပေါင်းပြီး ၂၀၁၆-၂၀၁၇ ခုနှစ်တွင်စက်ယန္တရားဖြင့်ဖောက်လုပ်ခဲ့ပါသော်လည်း မိုးရာသီအချိန်တွင်မြေပြိုမှုများ ( Land Slide) ဆက်တိုက်ဖြစ်ပွားမှုကြောင့် သွားလာရန်အခက်အခဲများစွာကြုံတွေ့နေရသည့်ရွာလေးဖြစ်ပါသည် ။
ထို့ကြောင့်နိုင်ငံတကာခရီးသွားလုပ်ငန်းများအဆင်ပြေချောမွေ့သွားလာနိုင်စေရေးနှင့်ဒေသခံတိုင်ရင်းသားများ၏လူနေမှုဘဝမြင့်မားစေရေးတို့အတွက်နိုင်ငံတော်မှ လမ်း/တံတားများကိုတာဝန်ယူဖောက်လုပ်ပေးခဲ့မည်ဆိုပါက ရန်းခူကျေးရွာလေးသည် မြန်မာမှာသာမက အာဆီယံအမွေအနှစ်ကျေးရွာအဖြစ်သို့အသိအမှတ်ပြုနိုင်ကောင်းပြုနိုင်မည်ဖြစ်ပါသည် ။ 

ထို့ကြောင့်ပြည်တွင်းမှခရီးသွားချစ်သူမိတ်ဆွေအပေါင်းတို့လည်း ရန်းခူကျေးရွာလေးသို့တစ်ခါတစ်ခေါက်အရောက်သာလှမ်းလာခဲ့ကြပါလို့ရေးသားတင်ပြအပ်လိုက်ရပါတယ်ခင်ဗျာ ...။

(၆၇) နှစ်မြောက်ကယားပြည်နယ်နေ့အား ဤဆောင်းပါးဖြင့်ကြိုဆိုဂုဏ်ပြုအပ်ပါသည်ခင်ဗျာ 🙏🙏🙏

စည်သူမောင်
ဇန်နဝါရီလ ၇ ရက် ၂၀၁၉ ခုနှစ်

ဓါတ္ပံု ဧရာကိုကို
Credit >Sithu maung fb